"Un lugar ideal para os amantes da escalada en bloque, cunha escola que ofrece case 120 vías de diferentes niveis e alturas, situado preto do mar."

O Búlder (adaptación do inglés boulder), escalada en bloque, é unha modalidade de escalada que consiste en escalar bloques de rocha ou pequenas paredes sen a necesidade dos materiais de protección convencionais propios da escalada (corda, arnés, elementos de fixación, etc.).

A costa de Oia ofrécelles aos amantes desta modalidade deportiva un spot cunhas magníficas condicións situado por debaixo do cámping "O Muíño”. Á beira do mar, os amantes desta modalidade poderán gozar de bloques de diferentes niveis de dificultade.

Na parte alta de Oia existe unha escola de escalada que conta no seu haber con case 120 vías, repartidas en saíntes de máis de 90 graos e placas verticais de granito que alcanzan os 20 metros, aínda que a media adoita estar entre os 8 e 10 metros de altura. A gran maioría de vías son fáciles, de grao entre IV e 6c.